Kibaaroolu    Okutoba - Disemba karoo, 2006     Kibaaroolu ka bo Januwari karoo ka taa Maaci karoo to,  2007, ì fele Ka muru "Kibaari kutoolu" to, jang maa A lamoyi Momodu ”Justice” Daabo 26.12.2006 Tayiwani be Kambiya maakoyi la maani dookuwo to Tayiwaninkoolu la Prime minister Su Tseng-Chang, a ye Tayiwani bankoo la wakiloo tandi puru ka Kambiya maakoyi, fo a si a fango tarandi noo maani dookuwo to janning sanji seyoo be bang na. Su Tseng-Chang, meng ye a long ko, Tayiwaninkoolu la ñaatonkoo le ye a kerekere puru a si maabee a ye Peresidang Jamme la kalindiroo to, be diyaamu kang kibaaritaalaalu ye Disemba karoo tili tang ning luulu. A ko de, ñaafaa be jee le Kambiya la katakuwolu to ka a fango tarandi maani kuwo to. A ko, m`be ñing temboo meng to, ekaari wuli kiling, ì ye wo le dookuu maanoo to Kambiya jang, adung wo naata Tayiwani la maakoyiroo le kono. A ko, ñing beteyaata bankoo la baake, baawo a be senelaalu maakoyi la le ka ì la dimbaayaalu balundi aning ka doolu waafi marisewo to. A ko, wo kamma la Tayiwani be Kambiya senelaalu maakoyi la dontoroolu to, meng si a tinna ì si jambandoolu ning turoolu sang. A lamoyi Momodu ”Justice” Daabo 26.12.2006 Nayijeeriya la marari paatiyo ye moo tombong Paatiyo, meng be mararoo la Nayijeeriya bankoo kang, ì ye moo tombong ne meng be loo la paatiyo ye peresidang kariteefayoo to Epirel karoo jaari. Katsina kumandang bankoo la Governor Yar’Adua, ì ye wo le tombong beng baa to, meng keta Abuja Disemba karoo tili tang ning seyi, adung Nayijeeriya ñaatonkoo Olusegu Obasanjo ye a la loo faasaa le. Olusegu Obasanjo, ate be jii la le tumoo meng na, a la paatiyo ye Nayijeeriya mara sanji seyi ye kooma. A lamoyi Momodu ”Justice” Daabo 26.12.2006 Luwaa laata kendingo kang Kiitiilaa Moses Richards ye luwaa samba kendingo doo kang, ì ka a fo meng ye Samina Jallo. A ye Samina sorong sanji saba bunjawoo to, a ning dookuwo kolengo. Luwaa ye Samina muta ko, a ka montaayika tiñaaringolu le waafi bitikitiyolu yaa. Adung ì ko, ning a be ì waafi la, a ka a fo ko ì ye ko, Vita-Lait keekewo mu. Ì ko, a ka ñing montaayikalu ke karitongolu le kono ka ì janjandi bitikoolu to masimmaa kotoo kang. A lamoyi Momodu ”Justice” Daabo 26.12.2006 Poliisoolu ye kee doo muta cakoolu la saayaa kang Kibaaroolu, mennu bota Suffolk, Ankaliteeri bankoo kang, ye ñing ne tandi de, moo fulanjango mutata tumoo meng na, kisikisiroolu be ke kang caka luulu la saayaa to Suffolk santo saatee to. Ì ko, a too mu Stephen Wright le ti, adung ì sobita ko ate le ye Gemma Adams, Anneli Alderton, Tania Nicol, Annette Nichols ning Paula Clennell faa. Ñing Stephen Wright mu sanji tang naani ning sanji seyi kee le ti, adung ì ye a muta a la suwo kono Ipswich Disemba karoo tili tang ning kononto. A ko, a ye ñing musoolu long ne, bari ate mang ì faa. ”Kendingo be poliisollu la maroo kono adung ì be a ñininkaa la ñing musu luuloo la saayaa to le,” Supintendent Steward Gull ye ñing fo kibaaritaalaalu ye. Ñing musunding luuloo ye, ì ye ì tara fayiring santo saatewolu le to Nofemba karoo tili tang ning luulu, Disemba karoo tili seyi aning Disemba karoo tili tang ning fula. A lamoyi Momodu ”Justice” Daabo 26.12.2006 Bankoo ye kiitiyo wulindi kendingo doo kamma Bankoo ye kiitiyo wulindi kendingo doo kamma ko, ate ke ka fondinkewolu bulandi kulungo la ka ì samba Spain bankoo kang. Kendingo too mu Karafa Keeta le ti, adung ì ko, a ye kodoo, meng si taa fo miliyong saba, taa moolu bulu ka a fo ì ye ko, a be ì samba la Tubaabuduu le. Bari Karafa mang song ñing tuumiroo la. Ì ko, poliisoolu le ye Karafa muta Burufutu baadaa to Juunu karoo tambilaa tumoo meng na, a lafita fondinkewolu bulandi kulungo kono ka ì samba Spain. A la kiitiyo be kumaasi la Januwari karoo le kono jaari. A lamoyi Moodu Kante 21.12.2006 NAWEC la ñaatonkoo ye yamfoo daani Abudu Joobu, meng mu NAWEC la ñaatonkoo ti nung, kununkoo a taata ka futa Kambiya ñaatonkoo la Yaayaa Jamme ma ka yamfoo daani tumoo meng na mansakundaa ye a tuumi ko, a mang dookuwo ke a ñaama sako kodikuwolu karoo la. Kari dantang koomantoo ì ye a bayi a la palaasoo to adung ì naata a samba kiitiyo la fanaa. Diinañantonka fula, mennu mu Banjunu saatewo la Imaami baa Alhaaji Cerno Kaa ti aning Kambiya misilimoolu kafu baa la ñaatonkoo Alhaaji Bending Daraame, wolu ye Abudu Joobu dandang peresidango yaa. Ì ye a yitandi ko, ñing mansakundaa tententa ka Joobu samba kiitiyo to, wo be ke la malu baa le ti Joobu la dimbaayaa le la. Wo kamma la, ì ye yamfoo la kummaayaa bambandi baake adung ì ko, wo mu kuu kummaayaaring baa le ti Isilaamoo kono. Wo to le Peresidango Jamme sonta yamfoo la. A ko, a ye Abudu Joobu long kabiring waatoo meng na, ì be karambung kilingo to. Abudu Joobu la baaroo mang a ñaabo, bari Alla la kuwo kamma la a yamfata a la. NAWEC mu kompaniyo, meng marata kurango ning jiyo la Kambiya bankoo kang. Serung ì mang kañewo soto, kaatu ì fota dalasi miliyong saba le la. A lamoyi Moodu Kante 21.12.2006 Kee naani ye kibaarisafeelaa buutee Kee naani denta kibaarisaferilaa doo le la, meng bota Daily Express la kibaari kayitoo to, ì ye a juufara kendeke. Ñing keta Dimaasi lungo suutoo, ñing Disemba karoo tili tang waatoo meng na, a be seyi kang a yaa Pipeline maafango la Kambiya jang. Ñing kibaarisafeelaa, Baron Eloagu, mu Nayijiiriyan dingo le ti. A ko, folooto ñing kee naanoo ye a too ñininkaa, adung a ye a fo ì ye. Wo to le ì ye dati ka a tuloo bung, ì ka a damfung-damfung. Ì ka a fo a ye ko, a ka kuu fuuringolu safee Kambiya bankoo la kuwolu to. Musu doo naata finti ì kang. Wo to le ì borita, ì ning kodoo ning kayiti kummaayaaring doolu, ì ye mennu buusi a la. Baron Eloagu ko, a baloo kandita le adung a foota a la kodoo la, placeCitybari Alihamudulilaayi, a niyo tankata. A lamoyi Moodu Kante 21.12.2006 Jamme ye ninsituuraa muwang ning kiling dii fondinkewolu la Kambiya bankoo la ñaatonkoo, Peresidang Yaayaa Jamme, ye deemaaroo dii fondinkewolu la bengo to, ì be meng ke kang Birikaama saatewo kono. A ye fengolu mennu dii, wolu mu ninsituuraa muwang ning kiling, maani booto keme fula, aning Ankalee kodoo wuli tang luulu. Peresidang noomalankoo Aja Ayisatu Njayi Seedi le ye wo fengolu futandi kafoo ma. Wo fondinkewolu la bengo la daliiloo mu ka fondinkewolu la ñaatokuwolu kacaa, adung ì be ì la aadoolu aning balabooñootofeeyaa kuwolu yiriwandi la ñaameng bankoo kang. Luntang jamaa naata ka bo banku doolu to, mennu be ko Jinee Bissawu ning Ghana. Ñing bengo kummaayaata baake sako waatoo meng na, fondinkee jamaa le be katakuwolu ke kang ka ì la bankoo bula ka taa Tubaabuduu. Doolu ka taa hani baa siloo la, adung moo jamaa ka foo ì niyolu la jee. A lamoyi Moodu Kante 21.12.2006 Tubaabuduu taalaa tang seyi foota ì ñiyolu la Dimaasi tambilaa kulung doo le kupita Senekaali saatee doo daala, ì ka a fo meng ye St. Louis. Kulungo ning be faaring moolu la, mennu ye ì la taamoo kumaasi Kasamaansi lookung fula koomanto adung ì bee lafita ka taa Tubaabuduu. Kibaaroolu ka a yitandi ko, moo muwang ning naani tankata adung ì be lopitaanoo to St. Louis. Bari mennu foota ì ñiyolu la, wolu tambita moo tang seyi la. Ñing asidang siifaalu siyaata. Ning a ye a tara moolu bee foota ì niyolu la, kibaaritaalaalu buka ning kibaaroolu dantee noo juuna, kaatu taalaalu buka ì la feeroolu yitandi moolu la, ning kayitoolu te ì bulu. A lamoyi Fadil Siise 18.12.2006 Yaayaa Jamme toloota Arijuma tambilaa keta lung kummaa baa le ti Kambiyankoolu ye tumoo meng na moo wuli jamaa benta baayee to, Peresidang Yaayaa Jamme la tolooroo to sanji luulu naalaa. Luntang kummaa jamaa maabeeta jee le, wolu kono Nayijiiriya bankoo la peresidango, Toko, Itoopiya aning Murutanii la peresidango, Tayiwan bankoo la Minisita Baa (Prime Minister) aning Iran bankoo la peresidango noomalankoo. Peresidang Jamme ye laahidoo ke Kambiya la fankoo la kuwo to. A ko, a te tambi la sanji luulu warang sanji tang na, Kambiya bankoo be sembe baa soto la fankoo la karoo la, Tubaaboolu ka a fo memg ye Economic Superpower. A ko fanaa, kurango la kuwolu be sooneyaa la le, meng kummaayaata yiriwaa la kuwo to. Ka ñing yiriwaa soto, a suulata Kambiyankoolu bee le la dookuwo la, mennu ye ì la karitee fayi ate ye le, warang mennu mang a fayi a ye. Adung a ko, a yamfata moolu bee ye adung moolu si yamfa a ye fanaa. Sibiti lungo wulaaroo la a ye feeti baa le ke a la paatiyo moolu ye Banjunu, jali jamaa benta daamento. A lamoyi Moodu Kante 10.12.2006 Diina ñaatonkoolu mang song katadamfoo la Somaaliya Somaaliya la balabooñooto feeyaa ñaatonkoolu, ñing temboo kono, ì ning Somaaliya diina ñaatonkoolu be kacaa kang, ì be balaboonooto feeyaalu, mennu be ko katadamfoo, ì be wo doolu kuwolu ke la ñaadii le. Juuni karoo kono, tumoo meng na Misilimoolu la diina ñaatonkoolu, ì ka a fo meng ye Islamic Courts, ì ye bankoo taa semboo la, itolu ye a yitandi le ko, katadamfoo mu Seetaani la kuwo le ti. Adung ì naata dandalaaroo dii ko, ning ì ye moo je katadamfoo la warang ka a juubee, ì be duni kolengo le laa la a maarii kang. Kabiring Duniyaa bee katadamfoo be kering Jaamani bankoo kang Juuni karoo kono, ì ye kuurango bee faa Somaaliya jee ka moolu bali katadamfu juubeeroo la telewo to. Wo naata a ke, moolu fintita mbeedoolu kang ka ì la niikuyaa yitandi. Foloo-foloo, kabiring diina ñaatonkoolu ye Somaaliya bankoo taa, ì ye Sariyango le londi ka katadamfoo tong, sako Sunkaroo kono. Bari saaying ì ko, a mang ke ko, ì ye i bang balabooñooto feeyaa kuwolu la, bari ì lafita le, ì ye ì ke siloolu la, mennu ning Isilaamoo ye ñoo moyi. A lamoyi Moodu Kante 10.12.2006 Daasilaamenkoolu ye luntang bung kuwo jalayi Alifaalu ning fondinkewolu, mennu be Daasilaame saatewo kono Kambiya jang, ì ye jalayiroo ke luntang bungo la, meng loota jee kari dantang koomanto. Daasilaamenkoolu ye a yitandi ko, ka luntang bungo loo ì la saatewo to, wo be laañooyaa tulungo le samba la nang saatewo kono. Adung ì ko, wo ning Isilaamoo mang taa ñoo la fang. Saateemoolu kalita ko, ì be kuwo futandi la mansakundaa la. Ì ko, luntang bungo saatewo kono, a ka cakayaa le saabu, kaatu itolu ye a je, ning Jumoo ning Sibiti lungolu siita, musoolu ning kewolu le ka beng jee. Bari koroosilaa doolu ye a fo ko, saateemoolu ñanta ì la balango yitandi la kabiring datidulaa to, waatoo meng na bung loo kumaasita. Bari wolu ye i batu fo dookuwo bee pareeta. Ì ka diyaamu mesengolu wulindi. Dookuulaa doo, meng be wo luntang bungo to, a ye a fo ko, itolu mang tara cakayaa samba kang saatewo kono. A lamoyi Moodu Kante 10.12.2006 Sadaadaanilaalu ye ì kamfaa yitandi Sadaa daanilaalu aning kafu doolu Kambiya bankoo kang, ì ye ì la kamfaa yitandi tumoo meng na, kiitiibungo meng be Bundung, ye sadaadaanilaalu moo muwang ning feng samba bunjawoo to. Muhammed Koora, meng mu ñaatonkoo ti lanjuurutoolu la kafoo doo to, ye a yitandi ko, ì ye leetaroolu kii le mansakundaa to, aning bundaa doolu to, ka wo kiitiibungo la kiitiyo seyinkang koroosi kuu. A ko, ”Wo moolu ka ì la baluwo soto jee le to, baawo ì buka dookuwo ke noo ì fangolu ye, adung ì mang maakoyirilaa soto.” Kibaaribundaalu ka a yitandi ko, saaying ñing kuu siifaalu be kering Moofing banku jamaa le kang. A lamoyi Kaliilu Koli 9.12.2006 Soojaaroolu be n`dandangolu seneyandi kang Bii Sibiti lungo fanaa keta seneyandiroo le ti Kambiya bankoo kang jang. Jamaa jamaa, ñing seneyandiroo, ì ka a fo meng ye Set-Setal, a ka ke Sibitikung labango le la, kari-wo-kari. Bari saaying a keta juuna le ñing karoo kono, kaatu Kambiyankoolu lafita ì la luntangolu jiyandi la ning seneyaa le la lookung naalaa. Arijuma naalaa, luntang kummaa jamaa le be naa la ka bo bantala bankoolu kang, ka naa maabee Peresidang Jamme la tolooroo to ñing sanji luulu naalaa. Ñing seneyandiroo ka kumaasi talang kononto soomandaa le la, a ye bang talang kiling tilibuloo la. Bari kabiring m`be tambi kang Bijiloo talang saba wulaaroo la, ngà soojaari kafu baa tara dookuu baa la sila baloo la jee. Ngà soojaaroolu la ñaatonkoo tara jee, ì ka a fo meng ye Kolonel Lang Tombong Tamba (nataaloo bala), a ning a noomalankoo Pita Singate. Bitung ngà Kolonel Tamba ñininkaa, fo soojaaroolu fangolu le ye wakiloo taa ì la lafoo kang ka ñing dookuwo ke n`dandangolu la seneyaa to. Kolonel Tamba ye kuwolu saata n`ye ko: -   “Kambiya Soojaari Bundaa loodulaa mu ñing ne ti, ka bankoo dingolu tanka aning ka ì maakoyi. Wo to, ñing mang ke kuu kuta ti, meng nene mang ke. Ntolu ye ñing lungo fango londi le nung, janning bankoo la seneyandiroo lungo be loo la. Ntolu lafita ka ñing dookuwo ke moolu le ye, ka n`dandangolu seneyandi. Bari soojaaroolu la dookuwo mang tara looring ì la lafoo kang, bari yaamaroo.” Ning meng ye dookuwo je, soojaaroolu ye meng ke bii lungo la, i be a long na le ko, soojaaroolu si dookuwo meng ke noo waati sutungo kono, moo kotengolu te wo ke noo la. A lamoyi Kaliilu Koli 9.12.2006 Kambiya la Internet-layinoolu be taama kang ne kotenke Kambiya la Internet-layinoolu la taamoo mang beteyaa Nofemba karoo lookung labangolu kono. Wo ye mandinka.org kibaaribundaa fanaa batandi le nung n`na kibaaroolu la karoo la. N`na leera jamaa tiñaata, adung n`ñanta wolu dedaa la le, janning ngà siloo soto ka kibaari kutoolu funtidi. Wo le ye a tinna ì mang funti noo juuna. Saaying kibaaroolu ka naa le kotenke, kaatu layinoolu beteyaata adung kurango fanaa beteyaata baake nunto ti le. Mandinka.org be kibaari karannaalu daani la yamfoo la, m`be ali jayi la ali la muñoo kang. Ali a baraka. A lamoyi Fadil Siise 6.12.2006 Peresidang Jamme la kumpabooroo Iran bankoo kang Kunung wulaaroo Kambiya bankoo la ñaatonkoo Yaayaa Jamme, a naata ka bo Iran bankoo kang. A la tili saba kumpabooroo keta tumoo meng na, Iran bankoo la Peresidango Ahmedinejad ye a buuñaatoo kumandi jee.   Kunung, Peresidango be diyaamu kang kibaaritaalaalu ye tumoo meng na, a ye a la kontaanoo yitandi, kaatung a la kumpabooroo keta nafaa baa le ti. A ko, a ning a taañoolu, ì ning Iran bankoo la ñaatonkoo ning a la minisitaalu ye waatoo soto le, ì kacaata senoo la bundaa la kuwo to le, n`dandangolu la yiriwaa, aada kuwolu, politiki kuwolu aning londi lukaringolu la kuwolu to. A lamoyi Fadil Siise 6.12.2006 Kurango la kuwolu be sooneyaa kang ne Teneng lugo la, kurang masing kutoo futata Kambiya bankoo la pooroo to ka bo Iran bankoo kang. Bundaa meng marata kurang bungo la, ì ka a fo meng ye ko Global Electric Group, ì la ñaatonkoo Fadi Mazeki a ye ñing fo ko, ”Ñing mu kurang masing kiling ne ti wo saboolu kono, mennu be Birikaama la kurang bungo la timmandi la.” A ko, ñing dookuwo kono, kodoo meng dunta Birikaama la kurang bungo kunna, wo taata kaañang Tubaabuduu kodoo, Euro miliyong tang ning seyi le fee (18.000.000), meng si taa kaañang dalasi miliyong keme wooro aning tang luulu fee (650.000.000). A ye ñing ne yitandi ko, Birikaama la kurang bundaa la semboo be taa kaañang na Mekawati muwang ning luulu (25 MW) le fee. Birikaama la kurang bundaa kafuringo Kotu, a bee be taa kaañang na Mekawati tang kononto (90 MW) le fee. Mekawati mu kurango la semboo kontoo le ti. Ning i ye a juubee, Mekawati kiling kaañanta kilowati wuli kiling ne fee, warang Wati miliyong kiling (1 MW = 1.000 kW = 1.000.000 W). Wo to, ning i ye Birikaama la kurung bungo juubee, ate dorong si kurango dii noo koridaa wuli tang luulu (50,000) la le, mennu ye 60W lampu luulu soto, firijoo (120W) aning telee (80W) waati kilingo la. Kambiya bankoo la kurang bundaa, NAWEC la ñaatonkoo Momodu Jallow, a ye ñing fo ko, kurang kuu koleyaa, meng be kering, a be bo la le janning Disemba karoo faadulaa. Bankoo la Peresidango Yaayaa Jamme ye a yitandi ko, kurango la kuwo be sooneyaa kang ne Kambiya. A ye ñing kumoo fo waatoo meng na, a jiita kuluntiilaa jiidulaa to kunung soomandaa la. A ko, kurang masingolu futata le, bari dookuu jamaa le ñanta ke la hani saaying. Kaatu ì taamandiroo la kuwo to, elloo be jee le, ko meng kurang juloolu la dooyaa. Wo ka a tinna, ì ka kandi baa ke ning kurango be taama kang. A lamoyi Fadil Siise 6.12.2006 Spain mansakundaa ye moto kutoolu dii Kambiya la Kunung Talaatoo, Ruiz Jose, a ye diiroo ke Spain mansakundaa tooyaa la. Ì ye moto kuta tang ne dii Kambiya mansakundaa la, mennu bee mu Toyota moto keesimaalu le ti. A la diyaamoo kono, a ye ñing fo ko, ñing mu laahidoo le ti, a la mansakundaa ye meng taa Kambiya ye waatoo meng na, banku fuloolu ye kambengo siiñee fondinkewolu la taañaa to Spain bankoo kang. Banku fuloolu la ñing kambengo be looring ì la kata kuwolu le kang, ka dandulaa ke fondinkewolu la funtiñaa la bankoo kang. Peresidango noomalankoo, Aja Ayisatu Njayi Seedi ye ñing fo ko, banku fuloolu la suuloo le mu, adung Kambiya mang lafi foo la a la banku dingolu la, kaatu wolu le mu bankoo semboo ti. A ko, moolu si a kata ka taama luwaa la siloo la. A lamoyi Fadil Siise 4.12.2006 Cayiniisi kewo maabolaalu be luwaa ñaatilingo la Kee wooro, mennu daa bulata Cayiniisi dingo doo, ì ka a fo meng ye Jianzhong Xu, mutoo to ka a maabo, ì funtita luwaa ñaatilingo la Araba lungo la lookung tambilaa. Wo kee wooro, mennu tuumita, kee naani mu Libaniisi dingolu le ti adung fuloo mu Najiiriya dingolu le ti. Luwaa ye ì muta le ko, ì ñanta sanjii tang ning kononto le laa la bunjawoo kono. Adung luwaa ye ì yaamari fanaa ko, ì kiling-wo-kiling ñanta dalasi wuli muwang ning luulu le joo la, ka a ke jusu ñaburango ti Mr. Xu ye. Adung ì kono, ning meng mang ñing kodoo joo, wo be sanjii saba le laa la bunjawoo kono, meng ning a la sanjii tang ning konontoo mang ke kiling ti. Kibaaroolu ye a yitandi ko, ñing kee wooroo ye ñing Cayiniisi dingo muta a la bungo le kono Nofemba karoo tili muwang ning kilingo suutoo la. Ì lafita ka a samba Senekaali bankoo le kang. Ì la a mutaring koolaa, ì ye Tubaabuduu kodoo Euro miliyong luulu - warang dalasi miliyong tang ning seyi - le kaning a kung na, adung ì ko ning wo mang joo, ì te a bula la. A lamoyi Fadil Siise, 4.12.2006 Kambiya poliisoolu wulita cakayaa keloo la Kari tambilaa, a tili muwang ning naani, poliisoolu ye musu tang jamaa le muta ka cakayaa kele Kambiya bankoo kang. Observer kibaari kayitoo ye a yitandi ko, ì ye musu tang saba ning wooro le tuumi, adung ì ye musu naani la kiitiyo kuntu le fokabang. Kiitiikuntulaa Moses Richards, meng be Bundung kiitiibungo to, a ye wolu sorong bunjawoo to fo kari kiling. A be kiitiyo kuntu kang waatoo meng na, a ye moolu hakiloolu bulandi ko,  ñing maañaa ka kurang jawu baa le janjandi, ì ka fo meng ye “HIV” warang Eeds. A lamoyi Fadil Siise 23-11-2006 Dinkewo ye a faamaa faa ning maritoo la Kewo doo, meng too mu Maalamin Bojang ti, wo le dinkewo Momodu Bojang ye a faa ning maritoo la ñing Nofemba karaa tili tang ning naanoo la. Saabantewo dingo doo, ì ka a fo meng e Faatu Bojang, a ye a yitandi ko, ñing maasiiboo keta suutoo montoroo waati seyi le ti, kabiring a faamaa bota nang saloo la jaamango to. A ko, a faamaa be foñondingo la a la bungo kono waatoo meng na, a dinkee dunta a kang. Bitung a ye a lipa maritoo la a kungo to, a ye a kungo teyi. Wo koolaa a naata balang, a ko, moo-wo-moo dunta koridaa kono, a be ì faa la le. A balanta, fo poliisoolu le naata a muta. Faatu ye a yitandi ko, ñing dingo ning a faamaa meeta dunding ñoo la le. Kaatu Momodu ko, ì faamaa ye ì la koridaa le waafi, a ye a dii a la, bari wo mang song. A ko, wo le ye Momodu kamfaa, a naata tu balanding ka moolu bee silandi koridaa kono. A ye a faamaa singo kati le nung serung waatoo meng na a lafita ka a jolong kolongo kono. A lamoyi Momodu ”Justice” Daabo 23.11.2006 Bankoo ñaatonkoo ye minisita kotoo tombong Kambiya bankoo ñaatonkoo Yaayaa Jamme a ye Baabukari Jaata bayi a la palaasoo to Araba lungo, Noofemba karoo tili muwang ning fula. Wo kang a naata Usumaani Sonko seyindi a nooto ka a ke minisita ti meng marata bankoo kono kuuñaalu la. Ñing minisita kutoo, Usumaani Sonko, marata nung poliisoolu la, mennu be Kambiya bankaa kang. Musa Mboob, meng marata nung imikireesong bundaa la, saaying ate le marata poliisoolu la bankoo kang. A lamoyi Momodu ”Justice” Daabo 23.11.2006 Jaatakendeyaa bundaa la dookuu baa Bundaa, meng marata jaatikendeyaa la aning hadamadingolu la baluu ñiiñandoo la Kambiyala Kambiya bankoo kang, wolu le ning sarawiisi bundaalu ye dookuu baa ke ka booroolu juubee faramasingolu to, fo ì be beteyaaring fo hani saaing. Wo dookuwo kono kalamutandiroo naata ke ko, kuu jamaalu le be ke kang faramasing jamaa to, mennu ning luwaa mang taa. Ì ko, wolu kono faramasintiyo doolu ka moolu dundi dookuwo la ì la faramasingolu to, mennu mang londoo soto booroo la karoo la. Adung ì ko, faramasintiyo doolu ka ì la kayitoolu tapaleeyaa le aning ì ka booroolu waafi, mennu tiñaata. Ì ye moo doolu muta le adung saaying wolu be mansakundaa alifaalu maakoyi kang ne kisikisiroo to. Ñing dookuu baa keta Sibitoo le Nofemba karoo tili tang ning seyi. A lamoyi Momodu ”Justice” Daabo 23.11.2006 Fondinkewolu luwaa ñaatilingo la Ì be kiitindiroo ke kang Bundung kiitiibungo to lookung tambilaa waatoo meng na, ì ye fondinkee fula tuumi jee. Foloo to, fondinkee doo, ì ka a fo meng ye Momodu Laamin Boojang, ì ye a tuumi ko, ate le ye moo doo, ì ka a fo meng ye Pa Seeni Ñaasi, song-song kaboo la Kaanifila Kaanifing ñinang sango. Bari Momodu Laamin Boojang mang song tuumiroo ñing na. Wo kamma la ì naata a beeli dalasi wuli luulu. A la kiitiyo be kontinee la le. Wo koolaa fondinkee doo fanaa, ì ye me¿ tuumi ko, ate le dunta moo doo la koridaa kono ka a silandi ko, a be a faa la le, a fanaa dunta luwaa kasidaa le. Ì ko, ñing kewo, Abudulayi Sengoori, ate le ning murubaa dunta Momodu Tuure la koridaa to adung a naata Tuure sangaritoo silandi ko, a be a faa la le. Polisoolu ko, ñing kuwo keta Sancaba Suleyi Joobu le to, bari Sengoori mang song tuumiroo ñing na. Ì naata a beeli dalasi wuli luulu adung a la kiitiyo fanaa be kontinee kang ne. A lamoyi Momodu ”Justice” Daabo 23.11.2006 Kuluntiilaa bundaa be dookuwo londi la Kibaaroolu ye ñing yitandi le, North American Airlines kuluntiilaa bundaa, ì be ì buloo loo la le foloo ì la dookuwolu to, ì be meng ke kang Kambiya bankoo kang jang. North American Airlines la diyaamulaa, Mr. Steve Forsyth ye ñing yitandi ko, ì be dookuwo londi la Januwaari karoo meng ka naa, a tili tang ning naani. Mr. Forsyth ye ning yitandi ko, ì be dookuwolu londi la le foloo baawo taamalaalu mang siyaa, meng si a tinna, ì si kontinee noo dookuwo la Kambiya bankoo kang sango muumee. A ye mansakundaalu, mennu be Kambiya aning Ameerika, jayi ì la maakoyiroolu kang. North American Airlines ye dookuwo kumaasi Kambiya bankoo kang serung Juunu karoo kono, adung ì la kuluntiilaalu taata ka bo Kambiya ka taa Baltimore saatewo to, Maryland, USA. A lamoyi Moodu Kante,  22-11-2006 Winners Chalel la ñaatonkoo: Ntolu buka moolu faa Winners Chapel -coocoo la ñaatonkoo, Pastor Edwin Ogeneya, ye a yitandi ko, a te la coocoo moolu mang ke moofaalaalu ti. A ye wo kumoo fo a la coocoo to Dimaasi lung tambilaa la. A ye wo jinkaroo ke nung tumoo meng na, moolu ye a la cooci dingo doo tuumi ko, a daa be moolu kono, poliisoolu sobita mennu la ko, wo le daa bulata Ankaliteeri ding doo la saayaa to, meng keta Kambiya bankoo kang jang. Poliisoolu ye naata Pastor Edwin na cooci dingo muta fo waati dantang, bari saaying ì naata a bula. Kewo meng faata nung, a too mu Mr. West, adung a la musoo (nataaloo juubee) naata a fo kiitiibungo ye ko, a fango ye a keemaa faa. A lamoyi Moodu Kante,  22-11-2006 Deenaani furewo tombonta naamafayidulaa to Moolu ye deenaani furewo tombong Kaanifing na naamafayidulaa to ñing Nofemba karoo tili 16. Deenaanifurewo be bularing karitongo le kono biring moolu ye a je, adung moo mang a long, jumaa le ye wo deenaanoo fayi jee. Bari kabiring moolu ye a je, ì naata poliisoolu kumandi. Wolu naata a furewo samba lopitaanoo to. Ì naata a tara, sunkutundingo le mu. Poliisoolu be ñinindiroo ke kang musoo la, meng ye wo deenaanoo fayi. Adung a si kee noo, ning ì ye a maarii muta, ì be a samba la luwaa ñaatilingo la. Jamaa-jamaa musoolu mennu ka ì dingolu fayi, wo lu mu musoolu le ti, kewolu ka mennu moonee konomandi taaring. A lamoyi Moodu Kante,  22-11-2006 Kambiya kibaaritaalaalu la keebaa taata Amerika Kambiya bankoo la kibaari safeerilaalu aning a foolaalu la ñaatonkoo Madi Siise, ñing temboo a be Ameerika bankoo kang. Kafoo, meng be maraling kibaaritaalaalu la tankandiroo la duniyaa kono, ì ka foo mennu ye CPJ, ì ye a tombong ka a ke Moofinduu la kibaaritaalaa buuñaaring baa ti ñing sango kono. Wo kafoo be seedeyaa kayitoo dii la a la aning soorifeng doolu. Wo kafoo la daliiloo ka Madi tombong Moofinduu kono, wo le mu a la loodaa kibaaroolu la kuwolu la Moofinduula Moofinduu kono. Wo kafoo naata Daily Express -kayitoo la ñaatonkoo buuñaatoo kumandi ka maabee New York saatee baa to, wo beng baa be kering daameng. A lamoyi Fadil Siise 15.11.2006 Yaayaa Jamme toomaalu be safee la Kambiya bankoo la peresidango ning a la paatiyo, ì ka fo meng ye APRC, ì ye ñing kankulaaroo ke kunung: Moo-wo-moo, meng ye a dingo toolaa Peresidang Yaayaa Jamme la warang a la musoo, ì si a fo ì la saatewo la alikaaloo ye. Alikaaloo be ñing toolu safee la kayitoo bala ka ì dii seyifoo la. Seyifoolu fanaa be wolu dii la kumandangolu la, mennu be ì dii la APRC paatiyo la bundaa baa la, meng be Banjunu. Kambiya bankoo kibaari bundaa, ì ka fo meng ye GRTS, ye ñing yitandi kunung ko, ñing bee ñanta ke la janning ñing karoo tili muwang ning saboo be sii la. A lamoyi Moodu Kante 15.11.2006 Peresidang Jamme ye jusu ñaburango dii Kambiya bankoo la ñaatonkoo, Peresidang Yaayaa Jamme, a ye jusu ñaburango dii moolu la, mennu baadingolu tuta dimbaa janoo to, meng keta Kaanifing kabiring lookung kiling ning talaa koomanto, moo woorowula fota ì niyo la daamento. Peresidango ye dalasi wuli tang ne dii moolu la, mennu baading niyo tuta ñing dimbaa janoo to. A ye dalasi wuli luulu dii moolu la, mennu be ì jaara kang Banjunu lopitaani baa to. Adung a ye dalasi wuli muwang dii moo fula doo la, ì ye mennu samba Senekaali bankoo kang jaaraloo la. Peresidango ye ñing kodoo dii a noomalankoo le la, ka a futandi wo moolu la.  Aning bankoo la alifaa jamaa le fanaa taata jee, aning diina ñaatonkoolu. Peresidang Jamme ye yaamaroo dii ko, bandeeroolu bankoo kang taaring, ì si ì bee jindi fo teema, ka bankoo la sunoo yitandi.    A lamoyi Moodu Kante 15.11.2006 Senekaali be dindingolu la karambungo joo la Dibitee bungo meng be Senekaali bankoo kang, ì ye luwaa londi ko, mansakundaa ñanta dindingolu la karambungolu ning ì la jaatikendeyaa joo la le, mennu la wuluulaalu niyo tuta nung baa kono, tumoo menna ì ka a fo kulungo meng ye, Le Joola, kupita baa kono. Bari moo doolu ye ñing miira ko, Senekaali mansakundaa te wo laahidoo timmandi la. Ì lafita le moolu ye karitee fayi ì ye, kaatu a te mee la kariteefayoo daa be muta la jee. Le Joola kupita nung sanji naani koomanto le adung moo meng taata fo moo 1863, wolu le niyo tuta jee. Moo 64 le baluuta kulung na taalaalu kono. A lamoyi Moodu Kante 15.11.2006 Musoo ye a keemaa faa Sanji muwang musoo doo, poliisoolu ye wo le tuumi ko ate le ye a keemaa faa. Ì ko a ye posinoo le ke a keemaa ye ming fengo kono. Poliisoolu ye a yitandi le ko, tumoo menna musoo ye wo ming fengo dii a keemaa la, wo naata boyi adung kankango ka bo a daa kono. Moolu naata a samba Banjunu lopitaani baa to RVTH, bari a la saayaa naata tariyaa. Kuwo ñing keta nung Ñooro saatewo le kono, Saalung santoo to. Kewo too mu Samba Mbayi le ti, bari kibaaroolu ye a yitandi le ko, ì ye wo musoo diyaakuyaa futundi wo kewo ye le nung. A lamoyi Fadil Siise 07.11.2006 / Observer 01.11.2006 Tayiwani ye Kasamaansi keleborilaalu so maanoo la Talaata lungo la, Tayiwani Ambaasado ye maani booto keme ning tang luulu (150) dii keleborilaalu la, mennu borita ka bo Kaasamaasi, Senekaali bankoo kang, ka naa Kambiya jang. Ì ye naaki fengolu fanaa dii ì la le aning banaanoolu, mennu si taa kaañang kodoo dalasi wuli tang saba fee. Tayiwani Ambaasado ye diiroo meng ke keleborilaalu la kabiring keloo kumaasita, a si taa kaañang maani booto keme naani aning tang luulu. Ì ye ñing diiroo ke keleborilaalu le la, mennu borita keloo la ka naa sii saatee doolu to, mennu be naanewo maafango la Kambiya bankoo kang. Tayiwani bankoo la Ambaasado Patrick Chang, a ye ñing yitandi ko, keloo meng be Kaasamaasi, suuloo le mu Kambiya ye. Adung a ye ñing fo ko, a jikita ko, kayiroo be naa la Kaasamaasi le, a te ke la kuu meering ti, fo moolu si muru ì la wuluu saatewolu to aning ì fansung bankoo kang. A ye jayiroo ke kafoo la, meng ye ñing dookuu baa taa ì fang kang ka ñing maanoolu janjang moolu teema, mennu be suuloo kono. Adung a ko, a jikita ko kafu jamaa be kafu la le ka keleborilaalu maakoyi ì la taradulaalu to. Ibrayima Sonko, meng be maraling ñing dookuwo la, a ye ñing bambandi ko, maanoolu aning feng kotengolu, mennu diita keleborilaalu la, a be futa la ì ma le adung a be janjang na ì teema a ñaama le, a ye a yitandi. A lamoyi Fadil Siise 07.11.2006 / Observer Kaasi fetengo la maasiiboo Moo tang ning naani janita kaasi fetengo to, meng keta Kaanifing, Kambiya bankoo kang jang, Sibiti tambilaa. A sababoo keta dimbaa la kaasoo fetengo le ti. Ì la janoo ñing jawuyaata baake le, fo ì ye ì bee landi lopitaanoo to Banjunu (RVTH). Kibaaroolu, mennu futata n`na kibaaribundaa to saaying, wolu ye a yitandi ko, kee luulu le naata faa wolu kono. Koridaatiyo la musoo Seenabu Koli, a be dimbaa la boo daliiloo fo kang waatoo meng na, a ko, wo moo tang ning naanoo bee mu ì siiñoolu le ti, mennu naata ka ì maakoyi dimbaa faa la, kabiring dimbaa ñing bo ta. A ye ñing yitandi ko, dimbaa la boo sababoo keta a dinkewo le ti. A wo dinkewo ye kaasoo le seeroo taa bungo kono, bitung a ye kandiyo mala ka kaasoo ñing ñini, a be daameng to. Bitung kaasoo ñing naata dimbaa muta bungo kono wo le ñaama, a fetenta, meng naata ñing maasiiboo saabu. A ko, moo tang ning seyi le janita, bari mennu la janoo warata, wolu mu moo tang ning naani le ti. A ko, a mang a long foloo dimbaa ye tiiñaaroo meng ke ì ye. A lamoyi Fadil Siise 07.11.2006 / Point 31.10.2006 Henry Gomez: Politiki paatiyolu ye ke kiling ti Kambiya bankoo la diibitee karitee fayoo be sutiyaa kang ne, kaatu a be ke la Januwari naalaa. GPDP la patiyoo ñaatonkoo, Henry Gomez, a ye kiliri ke oposisong patiyolu la ka ke kiling ti, fo ì si siyaa dibitee bungo kono. Kabiring a be diyaamu la a la koridaa to Bakawu, a ye ñing ne fo ko, oposisong paatiyolu ye ñina kuwolu la, mennu tambita ì dammaalu teema, ì ye ñaato bayindi. A ko, kaatu wo dorong ne si ì kañendi noo Dibitee karitee fayi naalaa to. Gomez ko, ì ye bengo meng ke Kariteefayi Bundaa la koridaa baa to (IEC), a mang mee, ate fango ning Lamin Waa Juwara aning Halifa Salla kacaata le ko, suuloo be jee le puru ì la paatiyolu ye kafu ñooma ka ke kiling ti. A ko, ning ì keta kiling ti, ì be loo noo la le. Bari ning ì mang ke kiling ti, ì te loo noo la. Gomez ye ñing yitandi ko, ate mu moo kutoo le ti Kambiya politikoo kono, bari a te sii la fo ning a ye a je, ì la paatiyolu bee keta kiling ti. Kaatu wo le mu ì la semboo ti ka kañeeroo soto dibitee karitee fayi naalaa to. A lamoyi Fadil Siise/ Observer 25.10.2006 Armitage karambunto dindingolu la jerewoo          Karanbunto dinding muwang ning kononto (29), mennu be buku tang ning fula, wolu le ye jerewoo ke Armitage karambungo to Teneng lungo la Okutoobala Okutooba karoo tili 16. Ì ye karambung ñaatonkoo la ofisoo palanteeroolu, bundaalu aning karambungo la boosoo tiñaa. Jerewoo tumoo la, sunkutinding naani le ketuta kijafaroo kamma la, adung ì naata wolu samba Janjambure lopitaanoo to jaaraloo la, bari jaaralilaalu ye ì bula wo lungo fango le la. Karambunto dindingo doo ye a yitandi ko, ì la karambunto alifaalu ye falindiri ke luwaalu doolu le la, mennu mang beng itolu to, bari fo jerewoo dorong. Karambunto dindingo doo, ì ka fo meng ye Jawuru Suusoo, ko ì ye ì balandi domoroo le la banta, wo le ye a tinna ì ye jerewoo ke. A ko, kaatu aada kuwo le mu, karandingolu mennu be naa paree la, wolu ka domoroo ke banta le. Wo koolaa yaamarilaa jamaa naata ka ì yaamari kuluwo la, a ning buuñaa. Wolu kono, Babukaar Suware, meng marata karambundaa la wo tundoo to, a ye karambunto dindingolu yaamari ka kuwolu kacaa, wolu beteyaata, kaatung fitinakuwolu mang nafaa soto. A ko, Armitage mu karambung horomaring baa ti bankoo kang nunto daajikoo la karoo. Babukaar Suware A lamoyi Fadil Siise /Observer 20.10.2006 Tubaabu luntangolu la naa kumaasita kunung Tubaabu luntangolu, mennu taata kaañang moo 211 fee, wolu le futata Kambiya kuluntiilaa jiidulaa to kunung. Ñinnu bee bota Finiland bankoo le kang, adung ì la kuluntiilaa le mu kulung foloo ti, ka Tubaabu luntangolu la sang-wo-sang naa kumaasi bankoo kang ñinang sango la. Wo koolaa kulung fula doolu fanaa futata le, mennu bota Denmark aning Sweden bankoo kang. Ayida Salla, meng bota Tubaabu luntangolu ning aadoolu la bundaa to, a be diyaamu kang kibaari taalaalu ye tumoo meng na, a ye ñing yitandi ko, Tubaabu luntangolu, mennu le be Kambiya kumpaboo la ñinang sango la, ì si taa kaañang fo moo 108,000 fee. A ko, kulungolu be bo la bankoolu, mennu be ko Germany, Chech Republic, Italy aning Spain. Kaliba Sengore, meng bota Tubaabu luntangolu la bundaa doo to, ì ka fo meng ye GTA, a ye ñing ne fo ko, ì la koleyaa kuwo hani saaying, wo mu “bumsters” le ti. A ko, kisikisiroo meng keta Kambiya jang, wo ye a yitandi ko Tubaabu luntangolu, mennu be ì la sila foloolu la jang, ning keme mu, siidulaa tang wooro ning kononto (69 %) ye a dantee, ko ì te muru la nang kotenke, kaatu ñing kambaanoolu ka ì batandi le. A lamoyi Fadil Siise /Observer 19.10.2006 Peresidang Jamme ye minisita tang ning fula tombong Okutoba karoo tili 19 la, Peresidang Jamme ye a la ministaalu bondi ì la siirangolu to, ko Kambiyaa Bankoo sarititoolu ye a landi ñaameng. A saamoo la, Okutoba karoo tili 20 la, a ye minista 12 tombong, bari kibaroolu ye a yitandi ko, hani saaying, minista siirang naani be jee le, mennu mang moo soto foloo. Kibaaroolu ye a yitandi ko, moo 9 bee muruta ì la siirangolu to le. Minisita Yankuba Tuure, meng ye bankoo la senebundaa mara nung, saaying Peresidango ye ate le tombong ka bankoo la ñeemuta bundaa mara, aning jiyo sotoñaa. Minista kutoolu mu Kanjaa Saane le ti, meng be senebundaa mara la, aning Maba Jobe, meng be mara la bantalanbankoolu la kuwolu la.   A lamoyi Fadil Siise 18.10.2006 Karambunto dindingolu la katoo mang futa moolu la jikoo to Teneng lungo la, kibaaroolu mennu bota bundaa to, meng be maraling Moofinduu la Tilijii bankoolu la karambunto dindingolu la kotobooroo kuwolu la (WAEC), wolu ye a yitandi ko, karambunto dindingolu la kotoboori kayitoolu ñinang sango la, ì mang beteyaa, kaatu ñinang sango le jiita sang doolu bee ti mennu tambita. Kibaroolu ye a yitandi ko, karambunto dinding wuli luulu, keme woorowula aning tang ning saba (5713), mennu bota karambung tang naani ning saba (43) to, wolu le ye kotobooroo ke tumoo meng na, ì ye ì la sanji tang ning fuloo karango bang. Wo ye a yitandi ko, ñinang sango la karambunto dindingolu lafaata ka tambi serung sango la. Kibaaroolu fanaa ye a yitandi ko, kemoo kono, sunkutindingolu sitaa kaañang tang naani ning fula (42 %) fee. Kibaaroolu ye a yitandi ko, kotobooroo ñing ye fannaa kononto warang seyi ke soto, mennu mu ko meng siifaroo, Ankalee kango, sene dookuwo aning a ñongolu. Saaying, ñing karandinding 5713 kono, mennu ye kotobooroo ke, karandingolu mennu ye “credit” kañee fannaa kiling dorong to,  wolu kaañanta karanding 1031 le fee, adung mennu mang hani “credit” kiling soto ning fannaa kononto warakono, wolu mu karanding 3239 ne ti. Ñing kibaaroo naata ke jikilateyi kuu baa le ti moolu ye. A lamoyi Fadil Siise 18.10.2006 Kambiya la kooci kutoo naata Anthony Hey, Jaman dingo doo, meng be Kambiya katadamfu kafu baa, ì ka fo meng ye “Scorpions”, ñaatonkayaa la, a futata bankoo kang Talaata lungo la. Kibaaroolu ye a yitandi ko, ñing kooci (coach) kutoo la naa be dending kambengo bambandoo le la, ate ning Kambiya bankoo la katadamfu kafu baa (GFA) ye saritoolu mennu londi Okutoba karoo tili woorowula. Anthony Hey be nung Lesotho bankoo katadamfu kafu baa le kooci kang. A lamoyi Fadil Siise 18.10.2006 Kariteefayoo suulata fang sotoo la, tooñaa aning ñantoolu Duniyaa bee la kafu baa, ì ka a fo meng ye UN, ì ye moo meng kii nang Kambiya la kariteefayoo koroosi la, General Abdul Salam Abubakar, wo le futata ì la kibaaribundaa to, New York, Amerika bankoo kang. Kabiring a be i dantee la a la siloo la Kambiyala Kambiya la kariteefayoo to, meng keta bankoo kang Sekitemba karoo tili 22, a ko de, kariteefayoo keta tilingo aning tooñaa le kono. Bari a ye ñing kafu ko, bankoo suulata maakoyiroo la le ka bambandiri ke hadamadingolu la ñantoolu la, ko meng politiki paatiyoolu aning kibaaribundaalu si ì la dookuwo noo baake. A be diyaamu kang UN siirantiyo Kofi Annan ye waatoo meng na, a ko, ì la kibaaribundaa ye ko, kibaaroolu mennu ka janjang ka moolu sondomoolu  tenkunbaliyandi, wolu mu lanna tambi kumoolu le ti. A ye ñing fanaa fo ko, kariteefayoo keta tilingo ning tooñaa le kono, kaatu moo koteng daa mang bula kariteefayoo la kuwo to, meng mang mara a la. A ko kariteefayilaalu suulata karandiroo la le, sako politiki paatiyolu. A ye ñing fanaa bambandi ko, kibaari talaalu suulata karandiroo la le. General Abubakarr ye kiliroo ke UN la ko, ì si deemaaroo ke moolu la ñantoo la Kambiyala Kambiya bankoo kang jang, adung a ye ñing kafu ko, UNESCO kafoo be katoolu ke kang ne ka kibaari taalaalu karandiroo kumaasi Kambiya jang. A lamoyi Fadil Siise 18.10.2006 Kambiya ning Spain la denna kambengo Kambiya mansakundaa ning Spain mansakundaa ye kambengo siiñee fondinkewolu la taañaa to Spain bankoo kang. Spain bankoo la minista Marapinos, meng marata ì ning bantala bankoolu teema, a naata Kambiya bankoo kang. A ning Kambiya bankoo la minista Lamin Kaba Bajor, ì ye bengo soto Peresidango la koridaa baa to Banjunu. Janning ñing minisita fuloo be ñing kayitoo siiñee la, Kaba Bajor ye ñing luntango ning a taañoolu futandi Peresidango Noomalankoo Aja Ayisatu Njayi Seedi la ofisoo to. Spain bankoo la minista ye ñing fo ko, banku fuloolu bee le denta ñoomoyoo la, meng be dending fondinkewolu la dung ñaa la Spain bankoo kang. A ye ñing fanaa fo ko, a la mansakundaa be Kambiya bankoo maakoyi la fankoo la karoo la le aning ñaatotaa. Ì be maakoyiroo ke la fanaa kantari bundaa la ka ì karandi kuwolu la, mennu be dandulaa ke la fondinkewolu la funtoo la bankoo kang. A ko ñing ñoomoyoo mu banku fuloo bee la ñantoo le ti ka kantaroo bambandi naanewolu to. Minisita Marapinos ko, Kambiya dingolu mennu be Spain bankoo kang, kayiti te ì bulu, ì be wolu murundi la nang ne. Kambiya la minista Lamin Kaba Bajor ye ñing bambandi ko, ì ye joorangolu fanaa soto le aning feeroolu, mennu be kantarilaalu maakoyi la. KIbaaroolu, mennu futata n`na kibaaribundaa to kari tambilaa, ye a yitandi ko, Spain bankoo ye Euro miliyong luulu le laahidi Kambiya bankoo ye. Ñing fanaa be dending fondinkewolu maakoyoo le la, meng si loodulaa ke ì la funti ñaa la bankoo kang. A lamoyi Momodu Justice Daabo 5.10.2006 Kambiya fondinkewolu la taamasiloo mang beng Ñing Teneng tambilaa, Okutooba karoo tili foloo, Kambiya fondinkee, meng si taa fo moo tang saba ning saba wolu le muruta nang bankoo kang tumoo meng na, ì la hamoo ka dung Kanariya jooyoo to, a mang taa a ñaama. Fondinkee doo, meng be diyaamu kang, a ye ñing ne tandii de, ì bulata kulung ñing na nung Sekitemba karoo kono Tanji saatewo to adung ì ye tili luulu aning suuta luulu le ke jiyo kono janning ì be futa la Muritani bankoo kang. A ko, bari kabiring ì futata Muritani, kaputeenoo meng be kulungo kono, wo ye ñing ne tandii ko, a filita siloo la, meng ka taa Spain bankoo kang. Bari kulumbulalaa doolu ko, kaputeenoo ye ì neenee le, baawo a mang lafi ka taa Spain. Nataaloo: Tubaabuduu taalaa doolu la kulungo A lamoyi Momodu Justice Daabo 5.10.2006 Kambiya mansakundaa ye kambengo siiñee - ”Kurango la koleyaa kuwo be ke la taarikoo le ti” Kompaniyoo doo, ì ka a fo meng ye Global Management System, lookung tambilaa wolu le ning Kambiya mansakundaa ye kambengo siti ko, kompaniyoo ñing be kurango sopulaayoo taa la NAWEC bulu. A be diyaamu kang tumoo meng na, siiñeeroo keta a la kompaniyoo ning mansakundaa teema, kompaniyaa la ñaatonkoo Muhammad Bazzi ye ñing tandii de, janning kari wooro kurango la koleyaa kuwo be ke la taarikoo le ti Kambiya bankoo kang. A ye ñing tandii de, masing saba be siloo kang ne, adung ì be futa la bankoo kang ñing karoo bang dulaa. A lamoyi Momodu Justice Daabo 5.10.2006 Fondinkewo ye a fango jani Kibaaroolu, mennu futata mandinka.org la, ye ñing ne tandi de, fondinkee doo meng siyo be sanji muwang ning feng, wo le ye a fango jani Kanifing, fo a faata. Ì ko, fondinkee ñing, ì ka a fo meng ye Baabukar Samba, a ye esansoo le ke ì la bungo bee kono adung a naata a fango sorong jee, janning a be a fango jani la. Kibaaroolu ye a tandii le ko de, Samba mu moo le ti, meng ye karango ke GTTI karambungo to, fo a ye a bang. Bari ì ko, a lafita ka Kambiya bula ka taa Tubaabuduu, bari siloo mang sooneeyaa a ye. A lamoyi Momodu Justice Daabo 5.10.2006 Tubaaboo faalaalu la kiitiyo Kiitiyo, ì be meng ke kang musu doo la, ì ka a fo meng ye Kate Afori-West, aning moo doolu, a be tenteng na Okutooba karoo tili tang ning woorowula Birikaama kiitiibungo to. Ì ye musoo ning moo doolu tuumi ko, itolu le ye a keemaa faa Saañang saatewo kono ñing Juuni karoo, meng tambita teng. Keemaa mu Ankaliteeri Tubaaboo le ti, adung a la musoo ko, ate fango le ye a faa ning kudaa le la waatoo meng na, keemaa be siinoo la. A lamoyi Momodu Justice Daabo 4.10.2006 Moo fula faata baa siloo kang Ì ko, moo fula faata a mang mee, tumoo meng na ì la kulungo filita jiyo kono. Ì ko, kulungo ñing, a ye fondinkewolu le cika Kambiya bankoo kang puru ka ì samba Kanariya jooyoo, bari a naata fili jiyoo kono fo lookung fula ñong. Ì ko, kulungo la kompaasoo le tiñaata, meng ye a kendi, a foota siloo la. Kibaaroolu ye a tandi de, ñing mang ke siiñaa foloo ti, kulungolu ka fili baa kono, adung ì ko, mennu ye ñing fili labango ke teng, ì bee mu Kambiyankoolu le ti. A lamoyi Momodu Justice Daabo 4.10.2006 Lanjuuroolu la bataa Ñaatonkoo, meng be Kambiya bankoo fondinkee lanjuururingolu la kafoo to, Iburahima Dibasi, a ye a yitandi kunung ko de, lanjuurutoolu be baluu kang fuwaariyaa koleng baa le kono Kambiya bankoo kang jang. A be diyaamu kang tumoo meng na, a ning a kafuñoolu ye maakoyiribundaa doo kumpabo, ì ka a fo meng ye ko Action Aid. Dibasi ye ñing tandii de, moolu ka fatanfansoo samba lanjurutoolu kang ne lung-wo-lung. A ko, lanjurutoolu fanaa suulata maakoyiroolu la fo ì si mecoolu ning, mennu be ko kararoo, deberoo aning meci siifaa doolu. A lamoyi Momodu Justice Daabo 2.10.2006 Ì ye Tubaabuduu taalaalu muta Kambiya Ì si luwaa taamandi noo le Senekaali fondinkee tang aning naani kang tumoo meng na, ì ye ì muta Kambiya bankoo kang. Ñing fondinkewolu, ì ye ì muta lookung tambilaa Kaatong saatewo le to waatoo meng na, ì lafita ka kuntu Kambiya jiyo kono ka taa Spain bankoo kang, adung kayitoo te ì bulu. Ì ye ñing fondinkewolu funtindi kiitiibungo to, meng be Birikaama, bari ì mang song tuumiroo la, ì ye meng laa ì kang ko, ì mang Kambiya kayitoo soto. A lamoyi Momodu Justice Daabo 2.10.2006 Siifatanfansoo ye Kaanankoo niyo toora Kaanankoo doo, ì ka a fo meng ye Gerald Asamoah, a ye niitoora baa soto lookung tambilaa tumoo meng na, ì ye tooñeeroo ke a la, meng be dending siifatanfansoo la. Gerald ka katadamfoo ke Schalke katadamfu kafoo kono, adung a mu Moofingo le ti, meng ye katadamfoo ke Jaman bankoo ye ñing duniyaa bee ñooseeyaa katadamfu baa, meng tambita. ”Nte, nga a miira, siifatanfansoo mu kuwo le ti, meng tambita jang. A kuwo ye n niyo toora baake le”, a ye ñing tandii. Ñing tooñendiroo keta a la katadamfu bayee le to Jaman bankoo kang. A lamoyi Fadil Siise 24.09.2006   Peresidang Jamme: Yiriwaa mang dandulaa soto Kunung, Sekitemba karoo tili tang ning saba, a la kañewo koolaa, Kambiya peresidango Yaayaa Jamme ning kibaari taalaalu ye bengo soto a la koridaa baa to, Banjunu. Kibaari taalaalu ye a ñininkaa a la feeroolu la, mennu be dending bankoo la taañaatoo la. Kibaaritaalaa doo ye a ñininkaa: “I la maraloo kono sanji luulu tambilaa, tuloo jeta bankoo kang. Saaying, n`si n`yilla noo mung ne la?” Peresidango ye a jaabi Tubaabu mansaaloo la ko, ”Sango dorong ne mu dandulaa ti”, meng kotoo mu ñing ti, ”Yiriwaa mang dandulaa soto”. Kuwolu, a ye mennu laahidi, wolu mu ñinnu le ti: Foloo-foloo, ì be safaari dulaa loo la Yundumu kuluntiilaa jiidulaa maafango la. Safaari jamaa be ke la jee, adung kompaniyolu be feng jamaa dedaa la, sako kompiita joorangolu. Faani dadaadulaa fanaa be soto la jee, adung wo kamma la Kambiya fondinkewolu, mennu si taa kaañang moo wuli keme (100.000) fee, wolu le be dookuu soto la jee. Fondinkee wuli keme (100.000) doo kotengolu be siloo soto la ka londoo lafaa, aning dookuwo, bantala banku doo kang, bari a ko, a te wo bankoo too fo la saaying.    Kibaaritaalaa doo, meng bota Ankalee bankoo kang, ye peresidang Jamme ñininkaa, a ye mung ne miira fondinkewolu la kuwo to, mennu ka katoo ke ka taa Tubaabuduu bankoolu kang ning baa la, kayiti te ì bulu. Peresidang Jamme ye a jaabi ko, a mang lafi ka moolu wakilindi baa la siloo taa la, bari hani wo ñaa-wo-ñaa, taamoo be kering duniyaa jang waati-wo-waati. A ye Tubaaboolu hakiloo bulandi waatoo la, meng kumaasita sanji keme naani koomanto. A ko, wo waatoo la Tubaaboolu naata Moofinduu jang, ì mang kayiti soto. Ì ye moolu la moo bambandingolu diyaakuyaa samba jongyaa kono. Ning a ye a tara, wo Tubaabuduu bankoolu ye suuñaari fengolu bee jooseyi, taama doo te soto la ka bo Moofinduu, ning a mang ke Mooding toorisoolu la taamoo ti. Peresidang Jamme ye kibaari taalaalu kalamutandi kuwolu la, mennu ka yiriwaa tiñaa Moofinduu jang. Kuu jawu baa mu keloo le ti, ko meng Darfur la ñoofaa keloo Sudani bankoo kang. A ko, bataa kuu doo mu fang dooyaa le ti, hani saaying Moofingolu mang jikoo soto ì fangolu la kuwo to. Ñing mu kuwo le ti, Yaayaa Jamme ye meng bambandi baake. A lamoyi Fadil Siise 23.09.2006   Peresidango Jamme kañeeta siiñaa sabanjango to Kambiya bankoo la peresidango, Yaayaa Jamme, APRC paatiyo ye meng londi, ñing ne keta a la siiñaa sabanjango ti ka kañee peresidang kariteefayoo to. Saaying a ye siidulaa tang wooro ning woorowula le soto kemoo kono (67 %). Sanji 2001 kono, kemoo kono a ye tang luulu ning saba le soto (53 %). Wo to a la kañewo ñinang warata baake le. Niimaroolu fele:   Moo      Paatiyo Karitee- kesoolu   Siidulaa    1   Yaayaa Jamme       APRC     264.404    67 %    2   Useyinu Daabo  UDP/NRP/GPDP    104.808    27 %    3   Halifa Salla      NADD     27.473     6 % A bee    392.685   100 % Moo wuli keme wooro ning tang wooruwula (670.336) le ye kariteefayi kayitoo soto, wolu kono moo wuli keme saba ning tang kononto ning fula (392.685) le ye karitee fayi. Wo mu kemoo kono siidulaa tang luulu ning kononto (59%) le ti. Kariteefayi bundaa baa (IEC) ñaatonkoolu aning luntangolu, mennu naata ka Kambiya kariteefayoo koroosi, ì bee ye Kambiyankoolu jayi baake le, kaatung kariteefayoo keta kayiroo ning tenkungo le kono ko a ñanta ke la ñaameng. Bari bataakuwo domandingo meng sotota jee, wo le mu, moo doolu mang a long, ì ñanta ì la karitee fayi la kariteefayi dulaalu mennu to, ko Kambiya peresidango noomalankoo Ayisatu Njayi Seedi ye a fo ñaameng GRTS kibaari bundaa to. A lamoyi Fadil Siise 22.09.2006   Kambiyankoolu be ì la kariteelu fayi bii Moo wuli keme wooro ning tang wooruwula (670.000), mennu ye kariteefayi kayitoo soto, wolu le ye siloo soto ka taa ì la karitee fayi Kambiya bankoo kang bii, dameng moo miliyong kiling ning talaa be siiring jee. Kariteefayi dulaalu, mennu be bankoo kang, wolu si taa kaañang dulaa wuli kiling ñong fee. Karitee fayoo be ke la teng ne: Moo-wo-moo be kariteekese kiling ne soto la, ì be meng jolong na ì la dumboo kono. Ñing dumboolu bee be bitiring ne, ì ka huwo soto santo. Ñing kariteekesoo tambita wo huwo la, talango le kuma, meng be a yitandi la ko, ì ye ì la karitee fayi a ñaama le. Wo kamma la kariteefayi bundaa ye ñing kibaari ko, moo kana fooleesuwo samba ñing kariteefayidulaalu to, sako ka a talango kumandi. Dumbu-wo-dumbu ye a la paatiyo la kuluuroo le soto aning moo la nataaloo, paatiyo ye meng londi. Ñing daliiloo bee sunta ning karambaliyaa le la Kambiya bankoo kang. Kulooroolu ning toolu fele:                     Paatiyo   Moo, ì ye meng londi   Kulooroo  a.    UDP/NRP/GPDP   Useyinu Daabo   Netemunkoo  b.     APRC   Yaayaa Jamme   Jambakeroo  c.     NADD   Halifa Salla   Seebaloo A lamoyi Fadil Siise 21.09.2006 Dawuda Baa ye a la kafoo samba ñaato Dawuda Baa mu katadamfulaa le ti, meng ye a la katadamfuñoolu bee ñaatonkayaa katadundoo to. A la katadamfu kafoo, “KPV”, be Finiland bankoo la katadamfu kafoo la fannaa fulanjango kono, ì ka a fo meng ye “first division”.   M`be ñing tumoo meng to teng, ñooseyaa katadamfoo le be kering Finiland bankoo kang, ì ka a fo meng ye ko “Finnish Cup”, adung KPV ye kafu jamaa le kañee kañeeriñaa la, meng ye moolu tereng. Saaying kafu naanoo meng tuta jee, wolu kono kiling ne ñanta kañeeroo ke la, adung KPV be wolu kono le. Kunung KPV ye kafoo doo, Kymen Palloseura, kañee katadaañaa saba la, wolu mang feng soto (3-0). Meng ye ñinnu bee dundi, wo mu kafoo la santiyango le ti, Dawuda Baa. A Kambiyankoo doo, Abudullayi Koor le ye deemaaroo ke kata fula doo dundoo to. Kambiyanka sabanjango, Demba Savage, fanaa be ñing kafoo kono le, meng ye Kambiyankoolu darajandi baake.