Karango ning safeeroo Mandinka kango to Ka karango ke Mandinka to, a mang koleyaa baake. Mandinka kango mu “fonetiki” kango le ti, ko Tubaaboolu ka a fo ñaameng. Kalima-wo-kalima, ka a fo ñaameng, a ka safee wo le ñaama. Ning i ye kumoolu safee kiling-kiling, ì foñaa buka faling. Hani wo, ning kulu sutiyaaringolu sujita ñoola adung i ka diyaamoo ke tariyaake, waati doo falindiroo ka ke le kuluborindoo kamma la: Misaali foloo:        “A fo a ye”, be kuma la ko meng ”a faa ye”         Harafu doolu ka taa santo, doolu duuma, bari a safeeñaa buka wo kuwo yitandi.         Hani wo, jamaa-jamaa kumoolu kotoo ka sooneeyaa moolu ye, mennu ye kango moyi. Misaali fulanjango:        ”Wuloo te wuloo kono.”        Wuloo, meng foloota adung daafengo le mu, a harafu labango ka taa santo, bari        Wuloo, meng mu a taradulaa ti, a harafu foloo ka taa santo.        Hani wo, kuma doolu be jee, i ñanta mennu la foñaa yitandi la safeeroo kono.         Wo to i ñanta “n” ning “n`”  fatandi la le ka a yitandi fo “nte” warang “ntolu” le mu.         I ñanta fanaa “i” ning “ì” fatandi la le ka a yitandi fo “ite” warang “itolu” le mu.         Saaying ñing maarikoo (`) be ke la wo kuloo santo, meng ye “jamaa” yitandi. Misaali sabanjango:        Ì te naa la i yaa.   = Itolu te naa la ite yaa. Mandinka kuloolu fele, Tubaabu kang doolu mang mennu soto: I si doolu karang ñing kuwolu to ka bo PDF –fayiloo to, meng safeeta Ankalee kango to, jang maa.